Dec292019
Dec282019
Czardas de Vittorio Monti
Sofia Tyurina, saxo soprano, e o pianista Denis Matsuev interpretan as Czardas de Vittorio Monti. Unha rapaza de 9 anos con moita musicalidade na súa sensibilidade musical e moita axilidade nos seus dedos acompañada por unha das primeiras figuras musicais do mundo pianístico.
Dec272019
Momento musical nº 3 – Sergei Rachmaninov
Os Momentos musicais op 16 de Sergei Rachmaninov son un conxunto de seis pezas que cada unha delas pode ser interpretada ailladamente. A número 3 describe un momento de ensoñación. Está en si menor, en compás de catro por catro, e na sección central aparece un stacatto de oitava na man esquerda que muda o ritmo inicial. É unha obra dominada por un fondo sentimento de tristura e resignación. Fermosa!
Neste vídeo está interpretada por Vadim Chaimovich
Dec262019
Balada – Debussy
Unha peza fermosa, unha melodía moi traballada harmonicamente, con sonoridades diferentes… A interpretación de Kathryn Stott é espléndida… A calidade do son, non tanto!
Dec82019
Musicograma Marcha Turca As ruinas de Atenas Beethoven
Dec62019
Adaxio do concerto para piano nº 23 – Mozart
A pianista Hélène Grimaud ofrécenos a súa versión do segundo movemento do Concerto nº 23 en la maior k488 nun fermoso vídeo elaborado pola súa discográfica.
Xul202019
Adeus ao piano
Unha sinxela obra póstuma de Beethoven para piano: Adeus ao piano.
Xul202019
Melodía Op 68 nº 1 Schumann
Esta famosa melodía de Schumann é unha das primeiras coas que os e as xóvenes pianistas deben enfrontarse. Pertence ao seu álbum titulado Álbum da xuventude, onde recolle unha serie de pezas orixinais xunto con consellos para guiar aos principiantes na arte de tocar o piano.
Nov122018
Tocatta Mambo – Rainer Hersch
Rainer Hersch é un continuador dunha forma de facer música e humor que practicaron grandes figuras que aunaban coma el un enorme virtuosismo musical cun dominio da escena e das claves da comedia, como Doodley Moore ou o mesmísimo Víctor Borge e demais.
No seu espectáculo Funkiest JS Bach EVERT!, Rainer incorpora unha versión xenial para grupo instrumental da tocatta correspondente á Toccata e fuga para órgano en re menor de JS Bach. Aquí está o resultado:
Abr212018
Terra e Alma – Moisés Quintas
Moisés Quintas, mestre, músico, compositor, pedagogo musical, vén de publicar na Editorial Canela, un libro-disco, trilingüe, titulado Terra e Alma.
A publicación está centrada nos Alalás, eses cantos ancentrais homófonos, de temática amorosa en todos os sensos do termo, de ámbito melódico máis ben reducido, con variedade modal (maiores, menores, eclesiásticos…) e cunha melodía flexible ritmicamente, doce e con melancolía.
O libro consta dun estudo sobre o alalá cun interesante resume final e partituras das músicas interpretadas no disco adxunto. Con cada partitura ofrécese unha fermosa fotografía relacionada, realizada polo fotógrafo Carlos Valcárcel Gay.
No disco podemos disfrutar de gravacións instrumentais (guitarra, zanfona, gaita, frautas traveseiras, ocarina, pitos de cana e de buxo, frautas de óso e caramela…) de 28 alalás tradicionais recollidos ou compostos por diversos autores, mesturados con sons da terra (chuvia, carro, campás, paxaros, río, sons propios de traballos agrícolas tradicionais…).
Consideramos este novo traballo de Moisés un gran acerto. Por un lado está a idea de relacionar cada alalá cunha fotografía evocadora ou relacionada; por outro, a escolla do branco e negro, que potencia o carácter ancestral; e, por último, a fusión dos sons variados da paisaxe galega coas interpretacións musicais. Tamén temos que salientar a musicalidade das interpretacións, que potencia o carácter sinxelo desta música, pero dunha calidade artística extraordinaria, e que consigue equiparar a expresividade da melodía instrumental á que é propia da voz humana.
Música, son e imaxe que saen da terra e da alma do noso pobo.
Unha pequena mostra: