iAnalyse é un programa de axuda para a análise musical, dispoñible para MacOS 10.5 Leopard. Permite sincronizar un ficheiro de audio cun conxunto de imaxes, por exemplo, unha partitura e facer anotacións sobre ela para resaltar motivos, estructuras como frases, temas, suxeitos… Pódese crear, ademais, un vídeo coa análise realizada.
O Departamento de Dinamización e Normalización Lingüística do CMUS de Ourense organiza, o próximo martes día 18 de decembro de 2007 ás 20:00 h, na Aula de Órgano, un acto para conmemorar o falecemento do compositor Ángel Barja nacido en Vilardevós. Haberá unha conferencia sobre a vida e obra deste compositor ourensán a cargo de D. Luis Costa, a interpretación de tres pezas para órgano (Canción triste, Suite para un gentil órgano e Tema y variación sobre el tema gregoriano Ave Maris Stella) con Marisol Mendive no instrumento e a actuació do coro Capela Madrigalista que interpretará unha obra vocal do compositor titulada Xan vai.
A asistencia é gratuita.
Temos nas nosas mans unha pequena xoia. Trátase da reedición do “Cancionero Gallego” de Martínez Torner e Bal y Gay que a Fundación Pedro Barrié de la Maza vén de realizar co gallo do seu corenta aniversario.
É unha fermosa edición facsímil que conta, ademais, cun magnífico estudo crítico do profesor Carlos Villanueva.
Non sería boa idea que a Consellería de Educación, soa ou xuntamente coa de Cultura, financiasen unha edición menos luxosa deste cancioneiro pero útil e imprescindible para as aulas de música e bibliotecas dos nosos centros de ensino de Primaria, Secundaria e Conservatorios? O estudo deste cancioneiro e a súa adaptación e incorporación ao repertorio escolar revitalizaría e aumentaría o coñecemento e a valoración do noso folclore galego, sería un modelo para futuras investigacións neste eido e contribuiría notable e eficazmente na normalización do Galego. Non sería esta unha inversión totalmente rendible?
Déixense de tanto plan, plan e plan e acometan medidas sinxelas, realistas e eficaces.
Neste mundo hai de todo… menos mal!
Se queren coñecer a posible relación entre o cacarexo das pitas e a música de Bach, lean esta nova.
Rameau é un dos grandes do Barroco Francés. O seu traballo teórico (sistematizou a harmonía da súa época e comezou dentro dos acordes coas súas inversións), como clavecinista (xunto con Couperin, os dous grandes) e, sobre todo, no terreo da ópera, a ópera-ballet ata chegar á comedia-ballet, fan del unha figura senlleira e única.
Onte puidemos disfrutar da comedia-ballet “Les Paladins“, en MezzoTv, que pasan por Digital+ (por certo, unha marabilla de canle). Pasei un tempo totalmente evadido do mundo escoitando a beleza da música, unha música que soa a popular pero sen ter esa orixe, unha música viva, unha música que che pon en movemento dada a súa riqueza e viveza rítmica e contemplando unha posta en escea áxil, divertida, moderna, que tira partido das novas tecnoloxías, unhas danzas actuais pero con aires da época… Unha realización e un espectáculo completo. ¡Grazas, Mezzo TV!
Slideshare constitúe unha ferramenta web que permite introducir presentacións tipo power point, odp (formato de OpenDocument) e pdf en distintas plataformas como CMS, blogs…
Agora Slideshare admite tamén audio, en formato wave (tamaño moi grande dos ficheiros). É o que chaman SlideCast. Se unimos a presentación co audio o resultado dá unha ferramenta moi útil para a Educación Musical. Vexamos algúns exemplos estupendos que Nos vemos en el Blog nos ofrece:
Agora podemos pasar a experimentar coa ferramenta. Ánimo!
Matización: SlideCast admite ficheiro mp3, segundo explica Marian no seu comentario.
Galicia faise día a día. O 25 de xullo ten moitos significados, case tantos coma galegos. Para uns é un día de festa; para outros,un día de festa relixiosa; para outros é un día de reivindicación e para outros, un día coma outro calquera. Cada un que lle dea o seu propio significado.
Para festexar esta data traemos a primeira estrofa do poema de Ramón Cabanillas, Galicia:
¡Galicia! Nai e Señora
sempre garimosa e forte;
preto e lonxe; onte, agora,
mañán… na vida e na morte!
Tamén publicamos o Himno Nacionalista Galego, con letra de Alfredo Brañas e Música de Iglesias Alvariño.
As Bandas Sonoras Orixinais son un xénero musical importante onde atoparnos con compositores e momentos musicais impresionantes. Estes días puidemos escoitar e ver no Canal Clásico o concerto que Trevor Jones dirixíu á OCRTVE o ano pasado con motivo de Soncinemad. Soaba a súa propia música e hei dicir que disfrutamos moitísimo, en especial, dalgúns intres espectaculares conseguidos cunha orquestra completa reforzada con guitarra, baixo eléctrico, acordeón, sintetizador… e un coro feminino. Por certo, no mercado podemos atopar un disco dobre con este concerto.
Hai tamén moitos outros estupendos compositores como John Williams, John Barry, Ennio Morricone, José Nieto…
Para adentrarse neste mundo, propoñemos dúas páxinas:
As grandes sinfónicas de USA tómanse moi en serio o tema da educación musical xa que, ademais de contribuír á formación integral dos rapaces están creando afeccionados e abonados para o futuro.
A Sinfónica de San Francisco posúe un curruncho adicado aos máis cativos. Entre outras actividades en liña, aquí pódese sintonizar unha emisora de radio, experimentar cos elementos da linguaxe musical nun laboratorio musical ou coñecer os instrumentos da orquestra. Evidentemente todo está en inglés, pero moitas actividades pódense realizar sen problemas.
A Orquestra Sinfónica de Galicia OSG está a piques de cumprir 15 anos. Parabéns!
O 15 de maio de 1992, baixo a batuta de Sabas Calvillo, iniciou a súa andaina musical esta orquestra galega formada nese tempo por 72 músicos de máis de 20 nacionalidades. O traballo diario e a grande cantidade de concertos organizados, os directores que traballaron e traballan con ela e unha boa xestión levaron a esta nosa orquestra a ser considerada, hoxe en día, unha das mellores de España. Os proxectos musicais que se están a desenvolver (Festival Mozart, coro, coro xove, orquestra xove) así como as actividades pedagóxicas que realiza crean na súa cidade unha canteira importante de oíntes e afeccionados que augura un interesante e próspero futuro. Tamén o número de músicos da terra aumentou co paso do tempo debido a estas iniciativas.
Desexamos que o espíritu de superación de todos os seus integrantes siga a dar tan bos resultados. Aproveitamos para expresar un desexo persoal: que se prodiguen máis polo sur de Galicia.
Parabéns!
Ampliaciónn: Poden ler a entrevista que “El País” realiza ao director titular da OSG Víctor Pablo Pérez.