Ensalada italiana

Os termos propios da linguaxe musical teñen a súa orixe no italiano. Palabras con pizzicato, tenutto, legato, appasionato, piano, con fuoco… aluden a conceptos relacionados coa expresión, coa dinámica, co tempo… Neste vídeo, un coro interpreta unha “Ensalada italiana” de Richard Geene e pode ser un bo exemplo para coñecer eses termos musicais e, o máis importante, o seu significado… Bon proveito!!

O canto do pobo

Os mestres e músicos Xosé Luís Rivas Cruz, “Mini”, e Baldomero Iglesias Dobarrio, “Mero” adicáronse entre 1972 e 1998 á recolleita de cantigas populares. O froito deste traballo é O Canto do Pobo, estupendo sitio web onde podemos escoitar as fontes orixinais, ver a letra e a transcrición das partituras.

Son de poetas – Letras Galegas

Agora que se achega a conmemoración das Letras Galegas 2010, que está adicada ao poeta de O Courel, Uxío Novoneyra, a web Son de poetas, recolle unha chea de poemas de escritoras e escritores galegos, musicados por autores tamén galegos. Recurso moi útil para estes días.

Un novo instrumento: o Happy Drum

O happy drum é un novo instrumento de percusión cun timbre e unha sonoridade que inunda de sensacións pacíficas a atmosfera onde soa. As melodías que agroman deste instrumento pertencen á escala pentatónica. Pódese tocar con baquetas ou cos dedos e palmas das mans. Semella moi intuitivo tocar e improvisar neste interesante instrumento.

Neste vídeo temos unha demostración do happy drum:

A voz humana e a súa clasificación

Unha páxina moi completa sobre a voz humana con teoría, vídeos explicativos, audicións e vídeos de artistas con diferentes voces podémola atopar nesta páxina La Voz do Departamento de Música do IES Mateo Alemán.

Aquí temos un mapa conceptual sobre a clasificación das voces moi útil e moi ben realizado. Ademais é multimedia, é dicir, incorpora son para poder ilustrar musicalmente os conceptos.


13 Lúas – Asociación de Gaiteiros Galegos

“A Asociación de Gaiteiros Galegos preséntavos un novo traballo audiovisual que leva por nome Trece Lúas. As lúas que compoñen o ciclo do ano, ou os doce meses do calendario; as lúas que dende tempos ancestrais foron guía da vida; as lúas que puxeron data aos traballos e tamén ás festas; as lúas que levan aparelladas unha fonda tradición cultural que chega ate os nosos días e agora queremos lembrar. Esta é unha viaxe no tempo, unha viaxe de doce meses con cadansúa canción, co ciclo do ano como fondo da escena.”
Así é como se presenta este novo traballo da AGG na súa páxina web.
Seguro que ten grande utilidade na escola.
13 Lúas