Adaxio do concerto para piano nº 23 – Mozart
A pianista Hélène Grimaud ofrécenos a súa versión do segundo movemento do Concerto nº 23 en la maior k488 nun fermoso vídeo elaborado pola súa discográfica.
Adeus ao piano
Unha sinxela obra póstuma de Beethoven para piano: Adeus ao piano.
Melodía Op 68 nº 1 Schumann
Esta famosa melodía de Schumann é unha das primeiras coas que os e as xóvenes pianistas deben enfrontarse. Pertence ao seu álbum titulado Álbum da xuventude, onde recolle unha serie de pezas orixinais xunto con consellos para guiar aos principiantes na arte de tocar o piano.
Tocatta Mambo – Rainer Hersch
Rainer Hersch é un continuador dunha forma de facer música e humor que practicaron grandes figuras que aunaban coma el un enorme virtuosismo musical cun dominio da escena e das claves da comedia, como Doodley Moore ou o mesmísimo Víctor Borge e demais.
No seu espectáculo Funkiest JS Bach EVERT!, Rainer incorpora unha versión xenial para grupo instrumental da tocatta correspondente á Toccata e fuga para órgano en re menor de JS Bach. Aquí está o resultado:
Terra e Alma – Moisés Quintas
Moisés Quintas, mestre, músico, compositor, pedagogo musical, vén de publicar na Editorial Canela, un libro-disco, trilingüe, titulado Terra e Alma.
A publicación está centrada nos Alalás, eses cantos ancentrais homófonos, de temática amorosa en todos os sensos do termo, de ámbito melódico máis ben reducido, con variedade modal (maiores, menores, eclesiásticos…) e cunha melodía flexible ritmicamente, doce e con melancolía.
O libro consta dun estudo sobre o alalá cun interesante resume final e partituras das músicas interpretadas no disco adxunto. Con cada partitura ofrécese unha fermosa fotografía relacionada, realizada polo fotógrafo Carlos Valcárcel Gay.
No disco podemos disfrutar de gravacións instrumentais (guitarra, zanfona, gaita, frautas traveseiras, ocarina, pitos de cana e de buxo, frautas de óso e caramela…) de 28 alalás tradicionais recollidos ou compostos por diversos autores, mesturados con sons da terra (chuvia, carro, campás, paxaros, río, sons propios de traballos agrícolas tradicionais…).
Consideramos este novo traballo de Moisés un gran acerto. Por un lado está a idea de relacionar cada alalá cunha fotografía evocadora ou relacionada; por outro, a escolla do branco e negro, que potencia o carácter ancestral; e, por último, a fusión dos sons variados da paisaxe galega coas interpretacións musicais. Tamén temos que salientar a musicalidade das interpretacións, que potencia o carácter sinxelo desta música, pero dunha calidade artística extraordinaria, e que consigue equiparar a expresividade da melodía instrumental á que é propia da voz humana.
Música, son e imaxe que saen da terra e da alma do noso pobo.
Unha pequena mostra:
Trump Effect Sonata – Miguel López
Miguel López estaba a realizar os seus traballos musicais cotiás cando, coa toma de posesión de Donald Trump, ocorréuselle expresar os seus sentimentos ante un acontecemento que presaxiaba unha chea de nubes grises sobre o mundo. Xuntou dous temas para construír o primeiro movemento dunha sonata sobre “o efecto Trump”. O segundo tema é unha modificación maxistral do Himno da Alegría. O primeiro tema, a que vos soa?
Funcións harmónicas na música de Mozart
Este vídeo que ofrecemos pertence a unha serie que analiza as funcións tonais en obras de Mozart. Empezou co primeiro movemento da sonata para piano K 545:
O estudo evolucionou e atopamos este vídeo, aínda en progreso, sobre o primeiro tempo da sonata K 310.
Chacona para violín da Partita en re menor BWV 1004 – Bach
A Partita para violín en re menor BWV 1004 de Bach inclúe unha chacona, termo musical relacionado coa arte da variación. É unha peza sobrecolledora, ao parecer composta despois da morte da súa primeira esposa.
Guidon Kremer, cunha interpretación certamente limpa e clara con certo rubato, móstranos a peza para violín:
Brahms ideou un estudo para piano para a man esquerda cunha versión desta chacona. O pianista Sergey Kuznetsov marabíllanos con esta magnífica interpretación:
Ferruccio Busoni, neno prodixio e pianista virtuoso, quixo aportar o seu gran de area na recreación desta obra e compuxo unha versión a dúas mans para piano da chacona. A pianista Hélène Grimaud intepreta esta peza:
Espartaco e Frixia – Adaxio – Aram Khachaturian
Este famoso, inspirado e fermoso Adagio do ballet Espartaco e Frixia de Aram Khachaturian vai ser o protagonista da audición destes días. Imos disfrutar de tres versións:
Orquestral – Orquestra Sinfónica da Universidade de Carolina do Norte:
Piano e orquestra – Boris Berezovsky (piano); Russian Philharmonic e Fabio Mastrangelo como director:
Ballet – Con Carlos Acosta e Nina Kaptsova:
Invención nº 13 – Bach
As invencións a dúas e tres voces de Bach son obras moi apropiadas para o traballo na interpretación contrapuntística.
Ofrecemos a partitura da Invención nº 13, a dúas voces.
Invención XIII by musiescola