Blogue-Musicanaescola » Música Galega

Aló entre as pallas – Panxoliña

xixirei — Sat, 17 Dec 2011 09:59:40 +0000

Aló entre as pallas é unha das panxoliñas tradicionais máis coñecidas e cantadas en Galicia. Destaca a melodía da estrofa, se cadra, un chisco arranxada por algún músico.
Aquí en formato Scorch de Sibelius.
Aquí en formato pdf.

Os instrumentos musicais na tradición galega

xixirei — Tue, 06 Dec 2011 10:49:28 +0000

Esta é a versión web e interactiva do libro Os instrumentos musicais na Tradición Galega de Pablo Carpintero. Está promovida polo Arquivo Sonoro de Galicia do Consello da Cultura Galega.

Despedida de ano vello

xixirei — Thu, 31 Dec 2009 09:14:34 +0000

Por estas datas, ano novo, vida nova, cántanse as despedidas/entradas de ano que son cantos que aproveitan modelos doutras cancións galegas para reflectir unhas datas de moita diversión. Xeralmente sempre levaban acompañamento de moitos instrumentos para facer barullo e poder cantar e bailar.
Nesta Despedida de ano que presentamos podemos apreciar como se suceden tres xotas na mesma canción.
Feliz e próspero aninovo a todos/as!!!

Don Sancho

xixirei — Tue, 29 Dec 2009 09:46:33 +0000

Un romance galego que conta a historia de Don Sancho, quen foi a terra de mouros e volveu deixando a súa alma prendida nunha fonte… Presentamos dúas partituras:
- Para voz.
- Para frauta, en re menor, para practicar o si bemol.

Tamén en versión pdf.

Himno Galego

xixirei — Mon, 07 Dec 2009 15:53:52 +0000

Non está de máis incluír no noso sitio, agora que se achega a conmemoración do Estatuto de Autonomía de Galicia aprobado en referendo o 21 de decembro de 1980 (xa pasaron 19 anos), a partitura do Himno Galego, composición de Pascual Veiga con letra de Eduardo Pondal.
Para obter máis información sobre o Himno Galego, prema nesta ligazón ou consulte na Galipedia.

Negra sombra

xixirei — Fri, 07 Aug 2009 09:42:43 +0000

O compositor lucense Juan Montes (1840-1899) compuxo as «Seis baladas gallegas» editado por Canuto Berea y Cª de A Coruña. Trátase de seis composicións para piano (con letra) cos seguintes títulos: As lixeiras anduriñas, Doce sono, Negra sombra, Lonxe d’a terriña, Unha noita n’a eira d’o trigo e O pensar d’o labrego.

En Negra sombra, Montes pon música ao poema do mesmo nome de Rosalía de Castro. A balada para piano foi tomada polo autor dunha fantasía para orquestra. É posible que unha versión para coro existise antes, pero publicouse primeiro a versión para piano.

Esta é unha das melodías máis famosas e fermosas da nosa música galega, moitas veces versionada.

Un maio

xixirei — Sun, 10 May 2009 10:34:25 +0000

No mes de maio en moitas zonas de Galicia constrúense maios e invéntanse unhas coplas con aire crítico que os neos e os maiores cantan.
En Ourense celébranse o dia 3 de maio, festa da Santa Cruz. Por iso, o maio enxebre é unha pirámide que remata nunha cruz, feita de madeira, tea de saco, brións e colares de carrabouxos e flores de xesta branca e amarela. Logo están os maios artísticos que representan escenas típicas.
Traemos aquí unha cantiga de maio, concretamente de Vilalba (Lugo) que aparece no Cancioneiro de Torner e Bal y Gay. Si, nese cancioneiro que debería estar obrigatoriamente nas aulas de música de todas as escolas galegas… A melodía é alegre cunha inflexión no final da primeira semifrase moi lírica.
Dispoñible en pdf

25 de xullo. Día de Galicia.

xixirei — Wed, 25 Jul 2007 10:16:26 +0000

Galicia faise día a día. O 25 de xullo ten moitos significados, case tantos coma galegos. Para uns é un día de festa; para outros,un día de festa relixiosa; para outros é un día de reivindicación e para outros, un día coma outro calquera. Cada un que lle dea o seu propio significado.
Para festexar esta data traemos a primeira estrofa do poema de Ramón Cabanillas, Galicia:

¡Galicia! Nai e Señora

sempre garimosa e forte;

preto e lonxe; onte, agora,

mañán… na vida e na morte!

Tamén publicamos o Himno Nacionalista Galego, con letra de Alfredo Brañas e Música de Iglesias Alvariño.