Esta fermosa páxina coral composta por Franz Biebl (1906-2001) está perfectamente interpretada por este coro feminino Pro Musica Nyíregháza/Hungría, dirixida por Denes Szabo.
As sorprendentes modulacións que a partitura ofrece xunto coa claridade do texto e o bonito diálogo entre as voces fan desta obra unha das máis fermosas deste xénero.
Poden baixar esta partitura, e outras tamén para coro, en formato pdf nesta ligazón.
Os termos propios da linguaxe musical teñen a súa orixe no italiano. Palabras con pizzicato, tenutto, legato, appasionato, piano, con fuoco… aluden a conceptos relacionados coa expresión, coa dinámica, co tempo… Neste vídeo, un coro interpreta unha «Ensalada italiana» de Richard Geene e pode ser un bo exemplo para coñecer eses termos musicais e, o máis importante, o seu significado… Bon proveito!!
A zarabanda, danza antiga de orixe español, escrita en compás ternario e forma binaria, adoita un aire lento e solemne en Italia e Alemaña. Arcangelo Corelli compuxo esta zarabanda en re menor:
Unha versión reducida para piano e algo simplificada móstrase nesta partitura da mesma zarabanda en re menor
Realizado polo alumnado de Maxisterio de Expresión Plástica y Musical da Universidade de Málaga, presentamos este musicograma sobre o Valse das flores, da suite «O Crebanoces«, do compositor ruso Tchaikovsky.
Excelente artigo de Iván Lasso en Genbeta no que se presentan 10 sitios de onde descargar de balde efectos de son, en formatos variados, apropiados para traballos multimedia.
Completo recurso, tipo webquest, sobre a Música na Idade Media, realizado por Miguel Ángel Muñoz Martínez. Con ligazóns a moitos recursos moi interesantes e, por suposto, con actividades para o alumnado.
Mozart e as funcións harmónicas é un vídeo no que se mostran as funcións harmónicas no primeiro tempo da Sonata en Do maior de Mozart dun xeito especial… Un vídeo xenial, moi didáctico e orixinal.
No mes de agosto é tradicional a cita co órgano ibérico de Xunqueira de Ambía, Ourense. O XXI Ciclo de Órgano e Música Antiga, organizado polo Concello de Xunqueira de Ambía co patrocinio do Xacobeo 2010, programa catro concertos os días 8, 15, 22 e 29 de agosto. Este ano o protagonista absoluto do ciclo é Canco López e o grupo Ars Combinatoria. Temos tamén que salientar o concerto do día 22 a cargo do magnífico organista Jesús Gonzalo quen estamos seguros confeccionará un programa atractivo, variado e divertido para o público.
Poden acceder ao programa premendo nesta ligazón.
Xa está preparada a nova edición do ciclo Música en el Claustro, en Tui. Este ano, a variada oferta musical abrangue desde a música sefardí, con Ana Alcaide, ata as tendencias máis contemporáneas, co grupo Projecto de Foles. O ano Xacobeo será o fío conductor e, para apoiar aos xóvenes músicos de Tui, antes de cada concerto intervirán diferentes agrupacións xurdidas do Conservatorio de Tui. O festival comeza o 24 de agosto.