Canorus é un editor de partituras gratuito para Linux, Windows e MacOs que se está a desenvolver amodiño. Chama a atención algúns módulos que se queren implementar, como o módulo harmonía.
Harmony Assistant é un interesante editor para Windows e MacOS con boa relación prestacións/prezo. É salientable o módulo de voz para escoitar as partituras vocais. A casa Myriad posúe unha excelente ferramenta chamada PDFtoMusicPro que interpreta a música contida nun ficheiro pdf, non sobre pdf feitos a base de imaxes escaneadas. Tamén exporta o contido do pdf a formato xml, co que se pode abrir en calquera editor profesional de partituras.
Non está de máis incluír no noso sitio, agora que se achega a conmemoración do Estatuto de Autonomía de Galicia aprobado en referendo o 21 de decembro de 1980 (xa pasaron 19 anos), a partitura do Himno Galego, composición de Pascual Veiga con letra de Eduardo Pondal.
Para obter máis información sobre o Himno Galego, prema nesta ligazón ou consulte na Galipedia.
O xenial Rowan Atkinson toca o piano dun xeito singular. Ademais, interpreta o primeiro tempo da sonata Patética de Beethoven pero, cando se lle fai tarde, arríncase co último da sonata Claro de Lúa.
Os aplicativos en liña para aprender o nome das notas nas diferentes claves son cada vez máis numerosos. Nesta ligazón temos a posibilidade de practicar o nome con son, con diferentes grados de dificultade e diferentes claves.
Charles Chaplin foi un magnífico actor, director e compositor das bandas sonoras das súas propias películas. No filme “O grande dictador” hai unha escena onde Chaplin, barbeiro, arránxalle a cara a un cliente seguindo o ritmo e os temas da Danza húngara nº 5 de Brahms.
Xenial…!!!
A organización das Actividades para Escolares de Caixanova está a demostrar, no que atinxe á provincia de Ourense e na área musical, unha falta de criterio obxectivo e unha traición ao carácter cíclico que os organizadores dos diferentes concertos lle queren dar aos seus espectáculos.
Lembremos que hai coma dous eixos:
O habitual é que estas actividades se contemplen nas programacións da área artística no bloque musical. Constitúen unha ocasión “especial” e moi axeitada de achegarse á música, aos instrumentos, aos intérpretes e ao que significa asistir a un concerto en directo.
Polo tanto, señores organizadores, cando a un centro se lle denega a asistencia a un só destes concertos están a causar un gran dano ao noso alumnado porque se lles rompe a posibilidade de progresión na traxectoria deseñada nos concertos.
Pero cando a un centro se lle denega a participación en TODAS as actividades musicais, o dano é maiúsculo posto que a moitos rapaces e rapazas négaselle a posibilidade de asistir a un concerto e aproveitarse de todos os aspectos positivos citados anteriormente.
Un exemplo disto vai acontecer este curso 2009/2010. Ao noso centro, o curso pasado non lle concederon as actividades de música tradicional. Este curso, non nos concederon ningunha activade musical. Entre outras consecuencias, o alumnado de cuarto de primaria deste curso non poderá xa ter contacto coa actividade arredor da música tradicional.
Seguro que hemos atopar a forma de organizar unhas actividades semellantes no noso propio centro. Botarémoslle imaxinación, moito traballo e non faltará xente con ganas de axudarnos.
Antes de rematar, queremos “felicitar” a Caixanova polo seu “acerto” nas decisións tomadas na organización das actividades deste curso.
Esta famosa composición do xenial Beethoven, a Bagatella en la menor WoO 59, máis coñecida como Para Elisa, pódese escoitar e mirar. Ademais de ver a partitura e a evolución das distintas melodías e acompañamentos, podemos ver como evolucionan as mans do pianista sobre o teclado con dous ángulos de visión.
AVISO: Os alumnos e alumnas do meu cole perciben un insoportable pitido moi agudo neste vídeo, que para eles é insufrible, cousa que aos profesores non nos molesta nin o percibimos… Comprobádeo! Pode que aquí estea o fundamento do famoso “mosquito”, esa arma para desfacer botellóns… Ademais, desde hoxe hai unha nova versión sen o pitido, xa o advirte o vídeo.
Versión sen pitido agudo:
Nat King Cole compuxo unha fermosa canción adicada a Madrid. Despois da introdución hai unha sorpresa melódica. Toca adiviñar cal é esa famosa melodía… Semella bastante doado.
O happy drum é un novo instrumento de percusión cun timbre e unha sonoridade que inunda de sensacións pacíficas a atmosfera onde soa. As melodías que agroman deste instrumento pertencen á escala pentatónica. Pódese tocar con baquetas ou cos dedos e palmas das mans. Semella moi intuitivo tocar e improvisar neste interesante instrumento.
Neste vídeo temos unha demostración do happy drum:
Tamén pódese probar varios happy drum virtuais nesta ligazón