Frescobaldi… En versión para piano, interpretada por Ariel Langy. Non é unha interpretación histórica, porque tampouco o piano era un instrumento desa época. Pero, déixanos coa boca aberta este cativo…
A organización das Actividades para Escolares de Caixanova está a demostrar, no que atinxe á provincia de Ourense e na área musical, unha falta de criterio obxectivo e unha traición ao carácter cíclico que os organizadores dos diferentes concertos lle queren dar aos seus espectáculos.
Lembremos que hai coma dous eixos:
O habitual é que estas actividades se contemplen nas programacións da área artística no bloque musical. Constitúen unha ocasión «especial» e moi axeitada de achegarse á música, aos instrumentos, aos intérpretes e ao que significa asistir a un concerto en directo.
Polo tanto, señores organizadores, cando a un centro se lle denega a asistencia a un só destes concertos están a causar un gran dano ao noso alumnado porque se lles rompe a posibilidade de progresión na traxectoria deseñada nos concertos.
Pero cando a un centro se lle denega a participación en TODAS as actividades musicais, o dano é maiúsculo posto que a moitos rapaces e rapazas négaselle a posibilidade de asistir a un concerto e aproveitarse de todos os aspectos positivos citados anteriormente.
Un exemplo disto vai acontecer este curso 2009/2010. Ao noso centro, o curso pasado non lle concederon as actividades de música tradicional. Este curso, non nos concederon ningunha activade musical. Entre outras consecuencias, o alumnado de cuarto de primaria deste curso non poderá xa ter contacto coa actividade arredor da música tradicional.
Seguro que hemos atopar a forma de organizar unhas actividades semellantes no noso propio centro. Botarémoslle imaxinación, moito traballo e non faltará xente con ganas de axudarnos.
Antes de rematar, queremos «felicitar» a Caixanova polo seu «acerto» nas decisións tomadas na organización das actividades deste curso.
O happy drum é un novo instrumento de percusión cun timbre e unha sonoridade que inunda de sensacións pacíficas a atmosfera onde soa. As melodías que agroman deste instrumento pertencen á escala pentatónica. Pódese tocar con baquetas ou cos dedos e palmas das mans. Semella moi intuitivo tocar e improvisar neste interesante instrumento.
Neste vídeo temos unha demostración do happy drum:
Tamén pódese probar varios happy drum virtuais nesta ligazón
Unha das máis grandes pianistas españolas, de sona mundial, Alicia de Larrocha, faleceu este mediodía en Barcelona aos 86 anos. Durante a súa longa carreira de concertista acadou unha linguaxe interpretativa moi persoal dunha grande calidade artística, destacando nas súas versións da música pianística española, en especial da obra de Albéniz. As súas interpretacións da Suite Iberia son unha referencia para calquera pianista mundial que se queira achegar a esta fermosa e dificilísima obra.
Para coñecer mellor a Alicia de Larrocha, poden ler este interesante artigo doutra pianista española, Rosa Torres-Pardo, quen aporta a súa perspectiva como alumna dela.
O XX Ciclo de Órgano e Música Antiga de Xunqueira de Ambía, organizado polo Concello de Xunqueira de Ambía, está a piques de comezar. Prográmanse tres concertos, os días 16, 23 e 30 de agosto de 2009, ás 20:00 h na Colexiata de Santa María A Real de Xunqueira de Ambía – Ourense. A entrada é de balde ata completar aforo.
O primeiro concerto, día 16 de agosto, amosaranos un repertorio no que a danza será o fío conductor do mesmo a cargo da organista e profesora do CMUS de Ourense, Soledad Mendive Zabaldica
No segundo concierto, día 23 de agosto, serán protagonistas o órgano e a voz grazas á intervención do Trío Salanova formado por José María Berenguer (tenor), Alberto Tejerina (barítono) e Benantzi Bilbao (baixo e órgano) con obras de Anchieta e compositores do século de ouro do órgano ibérico.
O terceiro concerto, día 30 de agosto, correrá a cargo do Dúo La Oropéndola, formado polos excelentes organistas José Luis González Uriol e Javier Artigas Pina cun programa que xira arredor do órgano a catro mans.
Para unha información máis detallada sobre programas e demais, poden visitar o artigo correspondente na web de OrganOurense
A escala pentatónica, formada por cinco sons na que se eliminan os semitons, ten un poder educativo musical excelente. Varios sistemas pedagóxicos Orff, Kodaly, Wuytack téñena coma base do desenvolvemento melódico e das actividades de improvisación, harmonización e de acompañamento harmónico-rítmico.
Bobby McFerrin realiza un experimento co público asistente a un congreso de neurociencia. Toda a súa actuación é moi reveladora desde o punto de vista didáctico. Cando se senta comenta…»O que me resulta máis interesante disto é que non importa onde estea, onde sexa, todas as audiencias o entenden… Non importa onde… É a escala pentatónica…»
World Science Festival 2009: Bobby McFerrin Demonstrates the Power of the Pentatonic Scale from World Science Festival on Vimeo.
Fonte: Hispasonic
Todos os gobernos fan unhas cousas mellor e outras peor. O bipartito tivo os seus fallos mais unha das cousas boas que fixeron foi a de lanzar o centro de software libre Mancomún. Durante os últimos anos Mancomún mantivo actualizados en galego os programas informáticos máis usados como o navegador (Firefox) ou a ofimática (OpenOffice). O Galinux, un sistema operativo para poder ter a computadora completamente en galego tamén foi unha iniciativa de Mancomún.
Durante a campaña eleitoral o Partido Popular prometeu implantar o software libre, pero agora que están na Xunta ameazan con desmantelar Mancomún, e nós queremos evitalo. Se tí tamén queres que Mancomún continúe funcionando, axúdanos sumándote a esta campaña: clica nesta ligazón para enviarlles agora un correo electrónico.
_________
Nota: esta é unha réplica da nova publicada en ciberirmandade, o luns 13 Xullo 2009, por mor de que A Xunta ameaza con desmantelar Mancomún. Nova publicada tamén en ciberirmandade.
O Proxecto Galicia XXI ten como obxectivos recopilar a música de compositores galegos de todos os tempos para a formación frauta traveseira-piano e traballar moi preto dos compositores vivos para beber da rica fonte do autor para darlle á obra unha interpretación o máis fiel posible á idea orixinal. Outra das finalidades do grupo é seren un incentivo para a creación de música contemporánea para frauta e piano. O proxecto está desenvolvido polos músicos galegos Luis Soto (frauta traveseira) e Diego García (piano).
Saudamos e queremos dar o noso apoio a esta interesante e útil iniciativa no eido musical galego. Máis información nesta ligazón.
Víctor Borge foi un pianista e comediante danés que desenvolveu gran parte da súa carreira musical e artística en EEUU. Neno prodixio, combinou a súa faceta concertística co humor e realizou actuacións verdadeiramente cheas de bo e fino humor, unha forma moi axeitada de difundir a música clásica.
Vexan unha proba disto neste vídeo, coa famosa Rapsodia húngara nº2 de Listz:
MuseScore é un editor de partituras de balde para linux e windows do que xa falamos hai un tempiño. O programa vai madurando e na próxima versión 0.9.5 aparecerán novidades sorprendentes…
A versión 0.9.4 permite crear partituras con boa calidade… En Linux Musical ofrécennos un curso de edición de partituras empregando MuseScore…