Blogue-Musicanaescola » Música para escoitar

Cuarteto para frauta en Re Maior K 285

xixirei — Sat, 31 Dec 2011 16:46:04 +0000

Rematemos o ano con moi boa música e excelente interpretación… Por que non finalizar 2011 con música de Mozart? Que veñen tempos difíciles, que vai ser un ano moi duro (sobre todo para os máis necesitados…), que a crise vai durar e que o goberno entrante está a facer todo o contrario do que dixo que ía facer (si é que dixo algo concreto…) Pois a todo isto negativo queremos opoñer a luz e a ledicia que irradia do primeiro movemento; a inspiración, a intensidade e a profundidade no sentimento do segundo movemento e a perfección e galante final de festa do terceiro movemento deste fermoso Cuarteto para frauta en re maior K 285 de Mozart. Esta música ten o poder de elevarnos sobre as nosas preocupacións e fornécenos uns minutos de auténtico goce. A interpretación de Emmanuel Pahud (frauta), Guy Braunstein (violín), Ori Kam (viola) e Olaf Maninger (celo) é extraordinaria.

Poden descargar a partitura aquí.

Primeiro movemento Allegro

Segundo e Terceiro movementos

O Crebanoces – Conto en vídeo

xixirei — Tue, 04 Jan 2011 09:40:21 +0000

Da man de MusicaEduca, coñecemos a existencia deste vídeo-conto sobre O Crebanoces de Tchaikovsky, creado por Eva Alonso, coas ilustracións de José Rubio Malagón e a factura ténica de Ismael Pantaleón.

O tema de Nokia, unha fuga e máis

xixirei — Sun, 02 Jan 2011 10:11:45 +0000

Hai tempo que tratamos este tema. Agora, ímolo actualizar e enriquecer…

Os teléfonos Nokia popularizaron unha melodía que, utilizada de xeito predeterminado, soou e aínda soa en moitos dos seus terminais. Esta melodía está extraída do Grande Valse para guitarra de Tárrega. Neste vídeo, a primeira vez que se escota o tema é no segundo 15.

Inspirándose na técnica compositiva do contrapunto e fuga, ao xeito de Bach, o compositor Vincent Lo presenta a Fuga Nokia op.31, que ten como tema esas poucas notas. Comproben o que o tema pode dar de si…:

O pianista Marc-André Hamelin tamén realizou os seus experimentos e compuxo o Valse Irritation d’après Nokia, unha pequena peza que escoitamos e da que podemos ver a partitura:

Ave María – Franz Biebl

xixirei — Sat, 16 Oct 2010 08:34:12 +0000

Esta fermosa páxina coral composta por Franz Biebl (1906-2001) está perfectamente interpretada por este coro feminino Pro Musica Nyíregháza/Hungría, dirixida por Denes Szabo.

As sorprendentes modulacións que a partitura ofrece xunto coa claridade do texto e o bonito diálogo entre as voces fan desta obra unha das máis fermosas deste xénero.

Poden baixar esta partitura, e outras tamén para coro, en formato pdf nesta ligazón.

Ensalada italiana

xixirei — Mon, 11 Oct 2010 19:29:37 +0000

Os termos propios da linguaxe musical teñen a súa orixe no italiano. Palabras con pizzicato, tenutto, legato, appasionato, piano, con fuoco… aluden a conceptos relacionados coa expresión, coa dinámica, co tempo… Neste vídeo, un coro interpreta unha «Ensalada italiana» de Richard Geene e pode ser un bo exemplo para coñecer eses termos musicais e, o máis importante, o seu significado… Bon proveito!!

Zarabanda en re menor – A. Corelli

xixirei — Sun, 03 Oct 2010 08:44:31 +0000

A zarabanda, danza antiga de orixe español, escrita en compás ternario e forma binaria, adoita un aire lento e solemne en Italia e Alemaña.
Arcangelo Corelli compuxo esta zarabanda en re menor:

Unha versión reducida para piano e algo simplificada móstrase nesta partitura da mesma zarabanda en re menor

Musicograma: O valse das flores – Tchaikovsky

xixirei — Sun, 19 Sep 2010 07:53:03 +0000

Realizado polo alumnado de Maxisterio de Expresión Plástica y Musical da Universidade de Málaga, presentamos este musicograma sobre o Valse das flores, da suite «O Crebanoces«, do compositor ruso Tchaikovsky.

Mozart, as funcións harmónicas e a sonata 15 para piano

xixirei — Sun, 15 Aug 2010 08:04:37 +0000

Mozart e as funcións harmónicas é un vídeo no que se mostran as funcións harmónicas no primeiro tempo da Sonata en Do maior de Mozart dun xeito especial… Un vídeo xenial, moi didáctico e orixinal.

Canción para o Día do Libro

xixirei — Fri, 23 Apr 2010 19:30:15 +0000

O 23 de abril é o Día do Libro. O grupo Migallas ten unha canción adicada ao libro. Aquí está:

A tuba

xixirei — Fri, 02 Apr 2010 08:44:57 +0000

O instrumento máis grande, o que ten un rexistro máis grave da familia de vento metal é a tuba. Empregada na orquestra de finais do XIX e durante o XX, amósase un instrumento fundamental en agrupacións como as bandas de música nas súas diversas variantes. Tamén se emprega nas bandas de jazz. Cada vez aumenta máis o seu papel como solista.
Neste vídeo pódese apreciar toda a gama de variantes e xeitos de tocar a tuba, incluso coa utilización de sons dobres…