Blog-Musicanaescola

A misa en do menor KV 427 de W.A.Mozart é unha xoia musical pola súa inspiración, pola súa fondura, polo seu lirismo e polos momentos brillantes e de extraordinaria beleza que nos brinda. É música, MÚ - SI - CA. Pode ser creente ou non creente, pero esta música de Mozart chegará ao fondo da alma, non lle deixará indiferente, ten o inmenso poder de elevarnos cara un mundo marabilloso de sons e sensacións. Se non a coñecen, anímense a entrar neste fermoso mundo.

Inspirándose nesta misa, concretamente no fermosísimo Kyrie, Mozart compuxo un exercicio de solfexo, Solfeggio in F , que nós brindámoslle en versión para clarinete e fagote, para que distingan claramente a melodía…

Os días 17, 24 e 31 de agosto, na Colexiata Santa María A Real de Xunqueira de Ambía. Ourense ás 20,00 horas, con entrada libre, desenvolverase o XIX Ciclo de Órgano e Música Antiga. Este evento está organizado polo Concello de Xunqueira de Ambía e subvencionado por CajaDuero e a Consellería de Cultura e Deportes da Xunta de Galicia.
Un ano máis chega ata nós este ciclo tan fermoso e como de costume, cunha grande calidade nos intérpretes. O día 17 de agosto, tocará Carlos Rodríguez Lajo, organista salmantino que representa á nova xeración de organistas. O día 24 de agosto, será a quenda de Juan de la Rubia, o organista máis galardoado da súa xeración e un auténtico mestre da improvisación. O día 30, Soledad Mendive (órgano), concertista e profesora de órgano do CMUS de Ourense e Sergio Guarné (trompeta) tocarán a dúo e como solistas, dándolle variedade ao ciclo.
Esperamos a calorosa resposta do público que, ano a ano, vén respondendo admirablemente ben ante a calidade dos músicos e da música que soa dentro deste fermoso templo e que ten como protagonista a ese marabilloso órgano ibérico, que recibimos dos nosos antergos e que, entre todos, temos que coñecer, valorar e mantelo nas mellores condicións posibles. Este é, sen dúbida, un dos obxectivos principais deste ciclo.

A Sinfónica de San Francisco (SFS) con Michael Tilson Thomas está a facer o grande labor de achegarlle as grandes obras sinfónicas de todos os tempos ao público dun xeito moi didáctico. Nesta liña, atopamos un material que facilita a comprensión da Terceira Sinfonía “Heroica” de Beethoven en Mi bemol Maior.
Pódese seguir a partitura, ver á vez un vídeo sincronizado coa mesma e seguir explicacións sobre a forma, a instrumentación, as tonalidades polas que transcorre esta obra. Todo en inglés, pero coa linguaxe musical xa saben que non hai fronteiras…

Terceira Sinfonía pola SFS

Seguindo coa publicación das “Seis Fuguetas” de Haendel, agora imos coa número 3, unha pequena peza en Re Maior con algúns momentos de beleza sonora.
Fugueta nº 3.

Estupendo vídeo en castelán sobre a fabricación dunha trompeta.

Denemo é un editor de partituras gratuito para Linux e Windows. Pode funcionar só ou pódese convertir nunha aplicación visual para empregar o programa de edición Lilypond, se temos que imprimir a partitura.

IMSLP é a biblioteca máis grande de partituras en formato pdf que existe. Estivo pechada unha tempada por problemas legais, que semellan xa resoltos. É unha sorte volver contar con este impresionante recurso.

Pelo Gato 24 é un novo disco da Asociación de Gaiteiros Galegos para fomentar o canto nas escolas e pór en valor os xogos populares.
Con letra e música do cancioneiro E. Torner e Bal y Gay, o grupo Migallas, interpreta Debaixo da figueira, unha canción con letra acumulativa, tan interesante para traballar a asociación lóxica, a memoria e a coordinación.

A paisaxe que nos rodea tamén pode ser sonora. Os centos de sons que nos envolven dannos información sobre o noso contorno e os que oímos a cotío convírtense en algo tan próximo que cando nos faltan botámolos de menos. Tamén cando chegamos a un novo lugar sorpredémonos moitas veces da paisaxe sonora que escoitamos.

Galica ten paisaxes sonoras peculiares, coma calquera outro lugar. Nesta web poden atopar e recoñecer algunhas:
www.escoitar.org.

Seguimos cos vídeos de alá do Atlántico. Neste, poden observar variantes sobre un xogo de mans, que se poden aplicar aos xogos de mans que as nosas rapazas (e rapaces) desenvolven nos recreos e tempos de lecer. Xa saben que isto dos xogos vai por temporadas: a temporada das canicas, dos xogos de mans, da corda…
Batom